Tulo ka minors na-rescue

CEBU, Philippines — Tulo ka menor de edad ang na-rescue sa kapulisan sa siyudad sa Talisay human sila nanglayas sa Youth Home didto sa Barangay Maghaway kagahapon sa ala una sa hapon.

Si PO2 Janeath Marquez sa Women and Children Protection nibutyag nga niadtong Sabado sa buntag nidangop sa ilang buhatan ang gwardya sa Youth Home ug nitug-an nga tulo ka menor nga naa sa ilang poder ang nisibat.

Ang maong pasilidad nahimutang tapad sa Talisay City Jail sa Maghaway nga bukirang barangay sa Talisay.

Matud pa ni Marquez nga ang ilang kaubanan sa Traffic Division Office na ang nidala sa tulo ka mga lalaki nga nagpangidaron 15, 13 ug 12 anyos. Nakit-an silang naglaroy-laroy lang sa kadalanan.

Gidala sa buhatan sa kapulisan ang tulo ug gikatakdang dad-on og balik sa maong pasilidad nga gidumala sa City Social Welfare and Development (CSWD). (Gabriel Bonjoc/IBM)

Jailguard positibo sa drug test

Usa ka jailguard sa Cebu City Jail ang gikatahong napositibo sa gihimong surprise drug test niadtong Biyernes, samtang gipaubos usab og drug test ang 243 ka mga magtutudlo sa day care centers sa dakbayan.

Ang Cebu City Office for Substance Abuse Prevention (COSAP) nihimo sa maong drug test sa mga magtutudlo atol sa monthly federation meeting kagahapon didto sa DepEd, human sa hangyo sa Department of Social Welfare Services (DSWS).

Kini ang kinaunhan nga nagpahigayon og drug test sa tanang day care teachers sa dakbayan.

Gibutyag ni COSAP Head Garry Lao nga dugay na kini nga hangyo sa DSWS sanglit sila man maoy pirmeng makauban sa mga estudyante.

Ang resulta sa maong drug test ipasa ngadto ni kanhi konsehal Leah Japson  ug Deputy Mayor for Education Konsehal Augustus Young.

Samtang gipahibalo ni Lao nga adunay nagpositibo sa gihimong surprise drug test sa 125 ka mga jailguards sa Cebu City Jail, apan wala siya masayod kon pila gyud ang nagpositibo.

Apan si Supt. Renante Rubio, jailwarden sa CCJ mikompirmar nga adunay usa ka jailguard nga nagpositibo sa maong drug test. Ipaubos pa hinuon kini sa confirmatory test.

Matud pa niya kon makompirmar nga positibo gyud ang maong jailguard iyang irekomendar ang pagpasaka og kaso batok niini apil na ang pagpataktak gikan sa serbisyo. (BANAT NEWS)