PHO nagpatabang sa Hunta

CEBU, Philippines — Nihangyo ngadto sa Sangguniang Panlalawigan sa Sugbo ang Provincial Health Office (PHO) nga mopalabang og resolusyon aron hangyoon ang mga mayor sa kalungsoran nga mohimo og listahan sa mga nabakunahan og dengue vaccine nga Dengvaxia.

Kini aron makagama og data base ang probinsya sa mga naturokan sa dengue vaccine alang sa ipahigayon nga monitoring sa mosunod nga mga katuigan.

Matud ni Catan, importante nga makahibalo sila sa history sa mga naturokan hilabina ang mga wala pa magka dengue sanglit mao kini ang gitumbok nga maoy angay bantayan.

Ang Sanofi Pasteur mipahibalo nga posibleng may mo-develop nga “severe dengue” niadtong gibakunahan nga wala pa magka dengue apan maprotektahan gyud kadtong nagka dengue na nga nabakunahan.

Ang lista ihatag nila sa tanang mga hospital sa probinsya sa publiko o pribadong tambalanan. Ang DOH miingon nga 159 mil ang nabakunahan og Dengvaxia sa probinsya. (BANAT NEWS)