Barug Team Rama magtigom og reward
CEBU, Philippines — Nagsabot ang mga sakop sa Barug Team Rama nga mag-amotay hangtud P300 mil aron maoy ihatag isip ganti sa tawong makatudlo o makatabang pag-ila ug sa pagsikop sa mamumuno ni Ermita Barangay kapitan Felicisimo “Imok” Rupinta.
Si Vice Mayor Edgardo Labella miingon nga nasabutan nila sa Barug Team Rama nga mangolekta og P300,000 reward money nga makatabang sa dinaliang kasulbaran sa maong krimen.
Giklaro ni Labella nga dako sila og pagsalig sa kapulisan ug gani nalipay sila nga miapil na ang National Bureau of Investigation (NBI) sa imbestigasyon sa kamatayon ni Rupinta. Mikomento usab si Konsehal Raymond Garcia sa Barug Team Rama diin sigon niya usa ka tawo lang matod pa ang malipay sa kamatayon ni Rupinta hinoon wala na kini mibutyag og ngalan.Samtang si Labella miingon nga kinahanglan gyud tan-awon sa mga tinugyanan sa balaod ang tanang anggulo nga posibleng rason sa pagpatay sa kapitan.
“Buot ipasabot tanang anggulo tan-awon, all the angles will have taken into consideration,” sigon ni Vice Mayor Labella. Si Mayor Tomas Osmeña kinsa sa iyang bahin miingon nga wala siya’y direktiba nga ihatag sa kapulisan apan kini mitataw kun unsay kinahanglanon sa mga otoridad andam motabang sa siyudad.
Giangkon niini nga nakurat ug wala niya damha ang nahitabo ni Kapitan Rupinta. Ang duha dili maayo ang relasyon tungod sa pagsige og saway sa mayor sa pamaagi pagdumala sa kapitan sa iyang barangay ilabi na mahitungod sa mga ilegal nga kalihokan diha sa maong barangay. Ang mayor miingon nga itugyan sa kapulisan ang pagpahigayon og imbestigasyon sa kaso dungan sa pagbutyag nga tanang anggulo mahimong subayon.
“You know people are looking at me because I’m an enemy so I don’t really like to say anything. Because whatever I will say they I’m trying to twist the direction. I don’t like to comment on thing like that because people are looking at me saying maybe I have something to do with it. So, I just stay my hands off,” matud sa mayor. Naka-halfmast ang bandila sa Pilipinas sa barangay hall sa Ermita isip pagpakita sa ilang pagbangotan sa nahitabo sa ilang kapitan.
Si Ermita Barangay Secretary Erwin Peñafort mihulagway nga dako kaayo og natampo si Rupinta sa peace and order sa barangay tungod kay duna kini baruganan ug dili mahadlok.
Kini midugang nga nasagmuyo sila sa nahitabo ug dakong kawad-on sa ilang lugar ang pagkamatay ni Rupinta. Samtang ang Commission on Human Rights-7 pinangulohan ni Director Arvin Odron mipadayag sa ilang kasubo ug mikondenar sa nahitabo kang Rupinta. (BANAT NEWS)
- Latest
