Job related ang ambush

CEBU, Philippines — Job related. Maoy usa sa mga gitutokang anggulo nga posibleng motibo sa pagbanhig patay kang Barangay Ermita Kapitan Felicisimo “Imok” Rupinta niadtong Huwebes sa gabii sa Sitio Simborio, Barangay Tayud sa lungsod sa Liloan.

Si Police Regional Office-7 Director Chief Supt. Jose Mario Espino nimando sa mga sakop sa paghimo og paspas nga imbestigasyon kalabot sa kamatayon ni Rupinta.

Si Rupinta nagmaneho sa iyang pickup kauban ang iyang kapuyo nga si Jocelyn Mendoza , pag-abot nila sa nahitaboan kalit silang girakrakan sa wala mailhing mga lalaki nga nagsakay og motorsiklo.

Matud pa ni Senior Supt. Jonathan Cabal, pangulo sa Regional Intelligence Division aduna na silay team nga gitukod karon nga gilangkoban sa kapulisan sa Dakbayan sa Sugbo, Liloan ug uban pa.

Sila magtinabangay sa pagpangaylap og mga impormasyon, testimonya, ebidensya ug uban pa nga makatabang sa imbestigasyon aron mailhan ug masikop ang mga gunmen.

Pipila ka mga tawo sa lugar nga posibleng nakasaksi sa panghitabo ang gipangutana ug gisusi usab kun aduna bay mga CCTV cameras sa maong lugar nga posibleng nakakuha og footage sa mga mamumuno.

Gitug-an ni Cabal, tanan anggulo ang ilaha karon nga gitutukan lakip na niini ang paghingusog sa kapitan batok sa ilegal nga pagpamaligya og ilegal nga drugas, sugal ug lakip na usab ang politika isip usa ka kapitan sa barangay.

Sumala pa ni Cabal, dako iyang pagtuo nga professional guns-for-hire ang nitira sa kapitan tungod sa kahanas niini sa pagpunting sa biktima.

Matud pa ni Police Officer 2 Ryl Pangatungan  sa Scene of the Crime Operation,  nahunong 155.2 metros ang sakyanan gikan sa giingong unang pagkaigo sa kapitan sa pagpusil.

Giingong sa driver side ang posible nga entry sa pagpusil ni Rupinta, apan aduna say laing posible entry sa likod dapit sa passenger side diin patumong ra gihapon ngadto sa kapitan, diin maoy iyang pagtuo duha ka tawo ang nakapusil sa kapitan.

 Base sa information nga gihatag ni Supt. Milbert Glade Esguera, hepe sa Liloan Police Station ilaha karon gisusi ang tanang impormasyon lakip na ang giingong adunay mga motor nga nagsunod sa kapitan.

Gikondenar

Ang pangulo sa Association of Barangay Captain Philip Zafra, nitug-an nga nasubo sila sa kamatayon ni Rupinta, apan dili kini makapaluya ug makapahadlok kanila sa pagpadayon sa ilang panarbaho tungod kay kabahin sa ilang trabaho ang mga hulga.

Sumala pa ni Zafra, tinalawan ang gihimo sa gunmen ni Rupinta ug maoy ilang panghinaut karon ang dinalian nga kasulbaran sa kamatayon niini.

Ang mga residente sa Barangay Ermita nagbangutan sa kamatayon sa ilang amahan sa barangay ug nanghinaut nga makadawat kini sa hustisya.

Usa sa mga trabahante sa barangay miingon nga pagkakaron kadaugan man sa mga kontra sa kapitan ang pagtaliwan niini apan maoy ilang pag-ampo nga makaangkon og hustisya ang kapitan.

Ang kapitan nasuspenso og unom ka buwan sa dihang wala mokooperar sa Anti-Drug Operation sa PDEA-7 ug sa pagbalik niini nihimo kini og kampanya pinaagi sa pagpamilit og stickers ngadto sa mga panimalay nga wala nalambigit sa ilegal nga drugas. (BANAT NEWS)