Vendors sa Sinulog may color-coding

CEBU, Philippines — Ipatuman sa kagamhanan sa Dakbayan sa Sugbo ang ID-based system ug color coding sa mga maninda atol sa Sinulog.

Ang Division for the Welfare of the Urban Poor (DWUP) ang mopahigayon sa registration diin prayoridad nila ang mga street vendors nga taga dakbayan.

Matud ni DWUP operation head, Genavieve Alcoseba, nga tuyo nila nga dili na masubli ang nahitabo sa ubang tuig diin nasapawan sa dili taga dakbayan ang mga vendors.

Dugang ni Alcoseba nga dakpon ang mga vendors nga walay ID aron dili mahimong walay pulos ang registration.

Sumala pa sab ni Alcoseba nga tumong nila nga magsilbing polis ang   mga vendors sa mga kadudahan sa ilang mahimutangan.

Dugang ni Alcoseba nga nagpabuhat sila og database ug ang registration magsugod sa tunga-tunga sa Disyembre aron mahan-ay na ang tanan sa dili pa ang Enero.

Subsob na ang gihimong pagpangandam sa kagamhanan ilabi na niadtong mga gustong moapil sa Sinulog Grand Parade.

Si Konsehal Dave Tumulak, executive committee chairman, niingon nga moabot na sa kapin 30 ang nagparehistro nga gustong moapil sa Sinulog Grand Parade sunod tuig.

Gawas sa mga contingents sa Dakbayan ug Probinsiya sa Sugbo, ang mga out-of-town contingents nga nagparehistro na mao ang Abuyog, Leyte; Catbalogan, Samar; Kidapawan City ug Panglao,     Bohol.

Gilauman nga mas modaghan pa ang magparehistro mao nga gipanglantawan nga ang Sinulog Grand Parade sayo kini nga sugdan aron makuha ang tinguha nga mahuman og sayo ang kalihukan. (BANAT NEWS)