Impormasyon ug paglikay sa fake news

CEBU, Philippines — Paspas nga pagkaylap sa mga impormasyon ug paglikay sa fake news ang gipangusgan sa Presidential Communication Operations Office (PCOO) pinaagi sa pag-edukar sa mga tinun-an ug nagkalain-laing information offices sa Probinsya ug Siyudad sa Sugbo.

Nakigtigum ang PCOO sa mga information officers sa mga Local Government Units (LGUs), National Government Agencies ug mga sakop sa media sa Kapitolyo kagahapon.

Matud ni PCOO Assistant Secretary, Atty. Marie Banaag, nga ang tumong sa pagbisita sa tagsa-tagsa ka mga dapit sa tibuok nasud ang labing epektibo nga pamaagi aron direkta nga mga impormasyon ang madunggan sa katawhan ug ang paglikay sa fake news.

Tungod sa nagkadaghang presensya sa fake news nga madunggan sa nagkalain-laing social media sites, nakit-an kini nga oportunidad sa PCOO nga sila na mismo ang mohatag sa opisyal nga pamahayag, aktibidades ug programa ubos sa administrasyon.

Ang mga tinun-an ang usa sa mga target sa PCOO kay sila ang kanunay naggamit sa teknolohiya ug adunay mga account sa nagkalain-laing social media apps ug makig-alayon sab ang buhatan sa mga IOs aron mapadali ang dagan sa impormasyon.

Subay niini, gilusad ang PCOO Network diin tanang communicators sa gobiyerno ang adunay direkta nga access sa opisina sa Presidente pinaagi sa PCOO aron minus o wala nay fake news nga mokaylap sa katawhan.

Matud sa new media director sa PCOO Net nga si Florinda Princess Duque nga gipaningkamutan sa tanang sakop sa ahensya ang pagkamalampuson sa tanang gihan-ay nila nga mga plano.

Ang Sugbo ang ika-napulo nga lugar nga nabisita sa PCOO ug naghinaot si Banaag nga mahuman na og bisita nila ang tibuok nasud sa Pebrero sunod tuig.

Mahimong mobisita sa opisyal nga website sa PCOO (www.pcoo.gov.ph) alang sa dugang pa nga mga impormasyon. (BANAT NEWS)