Mayor Gica gitangtang sa pwesto

CEBU, Philippines — Wala pa man matapos ang iyang usa ka tuig nga suspension tungod sa illegal nga pagpahigayon og raid gitangtang na karon gikan sa iyang pwesto sa Office of the Ombudsman ang nasuspensong mayor sa Dumanjug, Efren “Gungun” Gica.

Tungod gihapon kini sa giingong pagpaburot sa kantidad sa ilang gikan-an sa usa ka kan-anan sa dakbayan sa Sugbo.

Sa 15 ka pahina nga desisyon sa Office of the Ombudsman, aprobado ni Ombudsman Conchita Carpio Morales, si Gica napamatud-an nga guilty sa kasong serious dishonesty ug grave  misconduct.

“Wherefore, finding Efren Guntrano Zozobrado Gica, guilty, of Serious Dishonesty and Grave Misconduct, he is meted the penalty of dismissal from the service with forfeiture of all benefits, perpetual disqualification to hold public office and cancellation of all civil service eligibilities,” pagbasa sa desisyon sa Ombudsman penetsahan, Hulyo 27, 2017.

Ang kaso nag-ugat kini human mireklamo ang kaatbang sa politika ni Gica ug ang kanhi mayor sa Dumanjug nga si Nelson Garcia nga nipasangil nga gipaburot ni Gica og P10 mil ang resibo sa gikan-an niini nga restaurant sa dakbayan sa Sugbo atol sa seminar sa mga opisyal sa barangay alang sa Association of Local Budget Officers (ALBO).

Niadtong higayona bise mayor pa si Gica sa Dumanjug.

Sa complaint affidavit ni Garcia, siya namasangil nga si Gica nag cash advance og P50 mil gikan sa municipal treasurer alang sa maong seminar niadtong Abril 25, 2014.

Sa liquidation report nga giduso ni Gica, gisaysay niini nga moabot ngadto sa P21, 435 ang nagasto sa ilang pagkaon.  Apan si Garcia nakakuha og certified true copy sa orihinal nga duplicate sa resibo nga nagpakita nga ang nagasto ra sa kaon moabot ngadto sa P11, 435 o adunay P10 mil nga deperensya.

Sa desisyon sa Ombudsman gisaysay nga gimaomao ni Gica ang resibo sa kan-anan.

Si Gica sa iyang bahin nahibulong  kun nganong ang administrative case maoy gidesisyonan sa Ombudsman kay sa criminal case nga gipasaka ni Garcia niadtong Hulyo 2014 samtang pagkasunod tuig pa gipasaka og admin case.

 Matud ni Gica nga nawad-an na siya og paglaom sa Ombudsman hinungdan nga adto na siya moapelar sa kaso sa Court of Appeals.

Si Gica gisuspenso usab sa Ombudsman karong tuiga  tungod sa kasong misconduct and oppression human siya nangulo  pagronda sa usa ka panimalay nga walay search warrant didto sa Dumanjug. (BANAT NEWS)