Nakainom naligo sa dagat nalumos
CEBU, Philippines — Naglutaw nga patay na ang 42-anyos nga lalaki sa kadagatan sa Barangay Calong-calong, Dakbayan sa Toledo kagahapon sa buntag.
Giila ang maong lalaki nga si Servelando Lopez, ulitawo nga nagpuyo sa nahisgutang lugar.
Matud sa mga residente sa dapit nga ilang nakit-an ang maong biktima nga naglutaw na hinungdan nga ila kining gisusi.
Nasayran na lang nga wala nay kinabuhi ang biktima nga naglutaw sa dagat hinungdan nga dali usab sila nga nakapangayo og tabang.
Matud sa kabanay sa biktima nga gituohang nakainom og ilimnong makahubog ang biktima ug naligo sa dagat.
Dihang human sa pipila ka oras ila na lang nasayran nga nalumos ang biktima.
Wala’y nakita nga samad o bun-og sa lawas sa biktima. Gisuwayan pagdala sa Toledo City Hospital ang biktima apan gideklarar sa nag-atiman nga doktor nga wala nay kinabuhi.
Nagbangutan sab ang pamilya sa biktima kinsa gihulagway nga mapinanggaon og bata labi na sa iyang mga pag-umangkon. - /GMR) (BANAT NEWS)
- Latest
