Shabu niminus, marijuana nikusog

CEBU, Philippines — Giingong niminus na ang shabu apan marijuana ang nikusog sa Barangay Pooc, Dakbayan sa Talisay.

Kini maoy gitug-an ni Kapitan Bernard Balorio kinsa nagkanayon nga subsob ang pagpangdakop sa kapolisan sa mga tawo nga nalambigit sa ginadiling drugas maong nikunhod gyud ang gidaghanon sa iyang barangay nga namaligya niini.

Gani bisan pa man og wala na hatagi og gahum ang kapolisan nga maoy mohimo sa operasyon sa drugas, niminus gyud ang mga tawo sa ilang lugar nga nibalik og negosyo sa shabu.

Apan iyang giangkon nga marijuana na sab ang nidaghan sa ilang lugar. Matud ni Balorio nga iyang gisabyan ang hilig sa mga batan-on sa ilang lugar pinaagi sa paglambigit nila sa kalihukan sa barangay ingon man paghangyo kanila nga molikay na sa ilegal nga drugas.

Niadtong niaging adlaw nainsulto gyud si Balorio sa iyang konstituwente diin lantaran kini nga nagbitbit og marijuana.

Nangunay si Balorio sa pagdakop ni Jude Maneja, 24, kinsa iyang nakuhaan og usa ka stick sa marijuana sa iyang kamot.

Gidala sa Talisay City Police Station ni Balorio si Maneja ug gipasakaan gyud og kaso. - /GMR) (BANAT NEWS)