Grupong Maute padayong gi-monitor

CEBU, Philippines — Gi-monitor sa kapolisan ang mga teroristang grupong Maute gikan sa Marawi City nga posibleng mosamok sa Association of Southeast Asian Nations (Asean) Summit sa kaulohan karong Nobiyembre 13 hangtud 15.

Matud ni Police Regional Office-7 Director, Chief Supt. Jose Mario Espino, nga gimanduan sila ni Police Director General Ronald “Bato” Dela Rosa nga palig-onon ang ilang intelligence sa mga posibleng nahabiling sakop sa grupong Maute nga nagpakaaron-ingnong refugee sa kaulohan.

Nipagawas sab si Espino og direktiba sa iyang mga city ug provincial directors nga makig-alayon sa mga Muslim communities aron matabangan sila sa pagsuta kun kinsa pa ang mga nahabiling sakop sa mga terorista.

Ang Asean Summit tambungan sa mga delegado gikan sa mga nasud sa Southeast Asia diin sa katapusang semana sa Nobiyembre adto kini ipahigayon sa Bohol. (BANAT NEWS)