Magtiayon nasikop sa drug bust

CEBU, Philippines — Magtiayon sikop atol sa gipahigayon nga operation sa Philippine Drug Enforcement Agency- 7 kagahapon sa alas-5 sa buntag sa may A. Lopez Street, Barangay Labangon ning Dakbayan sa Sugbo. Ang operasyon gihimo ubos sa pagpangulo ni Director III Emerson Margate batok nilang Camilo Vallecera, 48, habal-habal driver, ug Elizabeth Vallecera, 47. Matud pa ni Leia Albiar, tigpamaba sa PDEA-7 dul-an sa usa ka semana nila gi-monitor ang kalihukan sa magtiayon una nila natigayon ang maong operation.

Sumala pa ni Albiar, nasakmit nila gikan sa magtiayon ang duha ka pakete nga drugas nga motimbang ug walo ka gramos nga mobalor og P40 mil base sa DDB value.

Ang magtiayon makadispatsar og 300 ngadto sa 500 gramos matag semana ug sakop sa distribusyon sa duha ang Labangon ug Talamban ug sagad sa ilang mga tigpalit nga ginagmay usab nga drug pushers.

Kasong kalapasan sa Section 5 sa Article II of RA 9165 ang ipasaka batok sa magtiayon kinsa kasamtangan nagtingkagol karon sa prisohan. (BANAT NEWS)