Rental subsidy lalisonon pa

CEBU, Philippines — Ang pangulo sa Cebu City Disaster Risk Reduction Management Office(CCDRRMO) Nagiel Bañacia miingon nga anaa na sa mga kamot sa Konseho sa siyudad kun aprubahan nila o dili ang rental subsidy allocation nga nagkantidad og P22 million alang sa 2018 operation.

Kini maoy tubag ni Bañacia dihang gipangutana kun unsay sunod nga mahitabo human malakip ang programa sa proposed P305 million sa  Local Disaster Risk Reduction and Management Fund alang sa sunod tuig.

Atol sa budget hearing si Konsehal Margarita Osmeña mipadayag nga dili kini kumbinsido sa proposal ni Bañacia kay nagtuo siya nga dako ra ang maong kantidad.

Ang rental subsidy moabot sa P9,000 nga gitagana sulod sa tulo ka buwan.

Kahinumduman niadtong buwan sa Marso ning tuiga, si Cebu City Mayor Tomas Osmeña nipirma sa Executive Order nga nagpatuman sa rental subsidy program aron tabangan ang mga biktima sa katalagman nga makaabang og balay samtang ang Division for the Welfare of the Urban Poor mag-re-blocking sa apektadong dapit. Tukion ug han-ayon pa ang tanan sa dili pa i-presentar ang proposed budget ngadto sa konseho karong Nobiyembre 7 alang sa final deliberation.

Giklaro usab niini bisan og ang mayor mipirma sa EO karong tuiga ang rental subsidy wala pa ma-implimentar gumikan sa kakuwang sa pundo.

Sa iyang bahin, si Konsehal Jocelyn Pesquera sa Barug Team Rama miingon nga dili siya pabor sa maong programa kay mas maayo nga ang siyudad mo-establisar og evacuation center inay manghatag og rental subsidy isip ayuda.

Apan si Konsehal Raymond Garcia pabor sa maong programa apan kinahanglan dunay guidelines nga sundon. (BANAT NEWS)