Mga higala ni Vidal mibalik lantaw sa kaagi

CEBU, Philippines — Emosyonal nga nipaambit sa ilang nagkalain-laing kasinatian ang mga kaubanan ni Archbishop Emeritus Ricardo Cardinal Vidal atol sa iyang haya diha sa Cebu Metropolitan Cathedral.

Usa kanila mao si Sister Maria Rosa Magapan, 68, naila sa tawag nga Mother Rosa sa Daughters of Saint Theresa kinsa adlaw-adlaw mibisita sa haya sukad nga naabot sa cathedral ang lawas sa arsobispo.

Kauban si Vidal ug Mother Rosa sa pagduso pagka beato ni Archbishop Teofilo Camomot ug sa pagproseso sa pagkasanto niini.  Ang duha sud nga managhigala sud na sa napulo ka tuig.

Si Archbishop Teofilo Camomot gituohan nga usa sa mga giingon nga kanunay magmilagro sa mga kabus.

Nitaliwan si Camomot kaniadtong Septiyembre 27, 1988 gumikan sa usa ka disgrasya.
Matud ni Mother Rosa si Vidal usa sa pinaka simple, mahiubsanon ug mainampoon nga tawo.

Samtang si Gobernador Hilario Davide III miingon nga nagsilbing sulo sa kahayag sa mga Sugboanon si Vidal.

“For nearly 35 years, Cardinal Vidal had been a beacon of faith and will continue to be a source of inspiration to the Cebuanos,” matud pang Davide sa suwat nga iyang gipadala ngadto kang Presidente Rodrigo Dutert pinaagi sa buhatan ni Presidential Assistant for the Visayas (OPAV) Secretary Michael Lloyd Dino nga naghangyo nga himoong holiday ang Oktubre 26.

Sumala pa ni Davide, makahinumdom siya nga tradisyon sa ilang pamilya nga matag Pasko adtoon nila sa balay si Vidal aron mo-greet og maayong Pasko.

Matud ni Davide tinud-anay nga “peacemaker” si Vidal ug gimahal sa mga Sugboanaon.

Ang Probinsya sa Sugbo misponsor kini og Santos nga Misa alang ni Vidal.

Apil sa mga mitambong kagahapon mao si Bise Gobernador Agnes Magpale ug mga provincial board members. (BANAT NEWS)