Dino maoy nagpaluyo sa kiha sa taga BOPK?

CEBU, Philippines — Nagduda si Cebu City Mayor Tomas Osmeña nga si Presidential Assistant for the Visayas Michael Dino ang nagpaluyo sa reklamo nga gipasaka ni kanhi Regional Director sa National Bureau of Investigation (NBI)-7 Atty. Florencio Villarin batok  kaniya ug sa mga opisyales sa siyudad.

Si Villarin misang-at og reklamo bahin sa matud pa iregularidad sa pagtudlo ni Osmeña sa mga naglingkod nga mga konsehal isip mga Deputy Mayors.

Niadtong Septiyembre 27 giduso ni Villarin ang kaso diha sa Ombudsman for the Visayas batok ni Osmeña ug laing siyam ka mga kanhi ug incumbent councilors sa Bando Osmeña Pundok Kauswagan (BOPK) nga gipangtudlo isip Deputy Mayors. Nagtuo si Villarin nga ang maong mga opisyal nihimo og dishonesty, grave misconduct prejudicial to the best interest of the service, ug culpable violation sa constitution ubos sa Section 60 sa Republic Act 7160 (Local Government Code of 1991) gumikan sa maong appointment.

Sa reklamo niini, gipasanginlan ni Villarin ang mga respondents nga nakalapas sa Code of Conduct and Ethical Standards for Public Officials and Employees ug sa 1987 Constitution.

Iyang giawhag ang Ombudsman nga ipaubos sa preventive suspension ang tanang gireklamo niya nga mga opisyal.

“You know, I think what he’s doing is to ask Dino, sige get Tommy suspended because of this, nangita og sala ba, nangita og technicality. I can smell it, I can smell it, all of these things from Ramil Ayuman, Joel Garganera,” sigon pa sa mayor.

Wala usab makauyon ang  mayor sa pamahayag ni Villarin nga ang gihimo niya mao ang pagtabang kang Presidente Rodrigo Duterte pagwagtang sa kurapsiyon sa gobiyerno.

“He is not eliminating corruption; he wasn’t able to identify even a single piece of corruption.

If I make somebody a team leader in a task force, is that a corruption? There’s something wrong with his values,” asoy pa sa mayor.

Subling giklaro niini nga ang pagtudlo og Deputy Mayor mao ang paggamit sa ilang mga talento samtang nagsilbi usab nga mga konsehal.

Si Villarin sa iyang bahin miklaro nga walay nagpaluyo kaniya ug walay labot si Dino sa iyahang desisyon kay wala siya makaila niini kay ang iyaha lang nga mahunong matod pa ang pagpangabuso sa mayor. (BANAT NEWS)