CCPO, CPPO nangandam sa Kalag-kalag

CEBU, Philippines — Usa ka semana sa wala pa ang Kalag-kalag, gipahinumduman ni Cebu City Police Office Director Joel Doria ang publiko nga dili magdala og mga butang nga gidili sulod sa mga sementeryo aron dili makaaberya sa adlaw sa mga minatay.

Si Doria niingon nga mas maayo nga dili na lang magdala og bag ilabi na kadtong mga dagko aron dili na makalangay sa pagsulod sa mga sementeryo.

Kini tungod kay anam-anamon pa og check sa kapolisan ang tagsa-tagsa ka bag sa mga moduaw sa sementeryo.

Matud niya nga ginadili sad sa pagdala og mga hinagiban sulod sa sementeryo.

Iyang gidugang nga magbutang ang CCPO sa nagkadaiyang sementeryo sa siyudad og mga pahinumdum alang sa publiko kabahin sa mga angay ug dili angay buhaton ug dalhon sulod sa sementeryo.

Sigun pa sa maong opisyal nga gisugdan na sa pagpakatap ang liboan ka kapolisan ingon man ang mga force multipliers.

Gawas sa mga police assistance desk, matud pa nga aduna say mga Mobile Patrol Group nga mag-roving.

Nunot niini mas motaas ang police visibility sa siyudad hinungdan nga mominus ang krimen sa Kalag-kalag.

Si Doria nibutyag nga walay hulga nga ilang na-monitor atol sa maong adlaw gawas na lang kun dunay moabot nga bagyo tungod kay mao kini ang makapasamot sa kahasol sa publiko.

Samtang si Cebu Provincial Police Office Deputy Director for Operation, Supt. Jaime Quiocho, nitataw nga andam na sab ang kapolisan sa probinsya alang sa Kalag-kalag.

Matud niya nga patas-on sab nila ang police visibility sa mga sementeryo sa nagkadaiyang lungsod ug dakbayan sa Pobinsiya sa Sugbo. -/GMR (BANAT NEWS)