Milampus tungod ni Vidal

CEBU, Philippines — Dili makalimot ang usa ka magtutudlo karon sa Mambaling National High School kang Archbishop Emeritus Ricardo Cardinal Vidal human kini nahimong instrumento sa iyang mga naabot karon.

Kini ang gitug-an ni Renato Friolo sa Banat News kinsa usa sa mga scholars ni Vidal sa iyang pagtungha sa kolehiyo.

Si Friolo, nangalagad sa una isip sakristan sa Archdiocesan Shrine of San Roque Mambaling, usa si Vidal sa iyang mga idolo, isip leader sa Simbahan ug dako iyang pagtahod niini.

Sumala pa niya si Vidal kay usa kini sa mga instrumento sa iyang kalampusan, tungod kay bisan sa ilang kawad-on nakalampos gayud siya sa iyang pagtoon tungod sa Cardinal Vidal Scholarship sa SIT. Sumala pa ni Friolo dili makaya sa iyang inahan kaniadto  nga mapatungha siya sa kolehiyo apan tungod sa scholarship sa Cardinal nakahuman siya ug nahimo nang magtutudlo.

Gitug-an ni Friolo, nga way gipangayong grado nga kinahanglang i-maintain si Vidal  mao nga para kaniya mao kini ang tinud-anay nga pagtabang sa mga kabus.

Mapasalamaton si Friolo, bisan sayod siya wala nakaila kaniya sa personal ang cardinal apan dili niya kalimtan nga mao kini ang nahimong instrumento nga nausab ang badlis sa iyang kapalaran. (BANAT NEWS)