12 ka CPDRC personnel gisuspenso
CEBU, Philippines — Dose ka mga kawani sa Cebu Provincial Detention and Rehabilitation Center (CPDRC) ang gipaubos og usa ka bulang preventive suspension ni Gob. Hilario Davide III tungod sa kalambigitan sa pagpalusot sa mga kontrabando ug ilegal nga drugas sulod sa maong prisohan. Matud pa nga 10 niini mga jail guards ug duha ka casual nga empleyado sa CPDRC. Gimandoan ni Davide ang Committee on Complaints and Investigation (CODI) nga imbestigahon ang maong mga kawani samtang sila gipaubos sa preventive suspension.
“Reports reaching me, indicate that there are some CPDRC personnel who are involved in the commission of acts prejudicial to the interest of the provincial government which may constitute misconduct or neglect of duty, mao ni ang reports kadtong sa mga nakasulod ang contrabands,” matud ni Davide kinsa midugang nga dili makasulod ang mga kontrabando kon walay gwardiya nga nalambigit.
Ang assistant jail warden sa CPDRC nga si Audesti Miguel nibutyag nga sa kamandoan nga giluwat sa gobernador ang mga personnel nga gipaubos sa preventive suspension mao sila si Fe Dabuco, Ludivina Briones, Mark Along, Lenjie Grondiano, Rafael Espina, Julius Genimelo, Glen Velozo, Joshua Barriga, Jessie Castañares, Vince Rosales, Edison Feraren ug Joel Teves. Ang preventive suspension usa kini ka pamaagi nga ipahamtang sa mga empleyado niini samtang gipaubos sa imbestigasyon sa giingong kalapasan nga nahimo aron di sila makapanghilabot sa imbestigasyon.
Giklaro sa gobernador nga dili pa kini silot sanglit gipaubos pa man ang maong mga kawani sa imbestigasyon ug mamahimong makuha pa nila ang sweldo sa usa ka bulan kun human sa 30 ka adlaw nga imbestigayon mapamatud-an nga dili sila guilty sa pasangil.
Si Atty. Orvi Ortega nga provincial legal officer sa Kapitolyo kinsa maoy chairman sa CODI nagkanayon nga kinahanglan pa usab nila patubagon ang maong mga personnel kalabot sa ilang gikalambigitan.
Mohangyo usab balik ang Kapitolyo ngadto sa Cebu Provincial Police Office (CPPO) nga modugang og polis sa maong prisohan. (BANAT NEWS)
- Latest
