Vidal mitaliwan na
CEBU, Philippines — Nagbangutan ang mga Sugbuanon lakip ang Archdiocese of Cebu sa pagtaliwan na ni Archbishop Emeritus Ricardo Cardinal Vidal kagahapon sa alas 7:26 sa buntag sulod sa usa ka pribado nga tambalanan.
Matud pa sa Private Caregiver ni Vidal nga si Joe Bernal, sayo sa kaadlawon, medyo hinay ang pinitik sa ginhawa niini ug pipila ka minuto nisaka pagbalik hinungdan mga alas-5 sa buntag gitabang pa kini hangtod nga kini nakutloan sa iyang kinabuhi.
Ang tigpamaba sa Archdiocese of Cebu Msgr. Joseph Tan, nitug-an nga impeksyon sa dugo nga nag-complicate sa uban niyang balatian, ilabi na sa iyang pagbalik-balik sa tambalanan ang hinungdan. Ang lawas sa cardinal gihaya karon sa Cebu Metropolitan Cathedral nga gidagsa dayon sa mga tawo nga gustong makakita kaniya bisan sa kataposang higayon.
Sa homiliya ni Cebu Archbishop Jose Palma sa Santos nga Misa nga gihimo didto kagabii iyang gihulagway si Vidal nga manggihatagon ug sama sa usa ka amahan mopangga.
"He (Vidal) is a blessing to us. Even if he passed away, his inspiration, his advice, (and) his example continues to be our guide in our faith," matud pang Palma. Gitug-an ni Tan, gihimo na tanan sa mga doktor aron ma-revive si Vidal apan lawas na gayud niini ang ni-surrender.
Si Rene Josef Bullecer suod nga higala ni Vidal nga niatiman kaniya diha sa tambalanan miingon nga adunay mga higayon nga nakadungog siya niini nga moingon tiguwang na kini ug gusto nang mopahuway.
Ang Catholic Bishop Conference of the Philippines mipahibalo usab sa ilang pagbangutan sa kamatayon ni Vidal.
Matud pa ni Archbishop Socrates Villages, CBCP-President, ang gugma ni Vidal sa kaparian, ang kalantip sa hunahuna ug pagkamahiubsanon ug debosyon ngadto sa Mahal nga Birhen magpabilin nga buhi sa tanang mga tawo nga gibiyaan niini.
Samtang si Cotabato Archbishop Orlando Cardinal Quevedo, nipadayag nga ang legasiya ni Vidal mao ang iyang pagkamaayong tawo.
Gawas sa mga kaparian mipaabot usab sa ilang pahasubo og mensahe ang nagkadaiyang personalidad sa Sugbo.
Si Presidente Rodrigo Duterte mipaabot na sa iyang pahasubo lakip na silang Mayor Tomas Osmeña, Gov. Hilario Davide III, Kong. Raul Del Mar ug bisan si PNP Chief Ronald “Bato” Dela Rosa. (BANAT NEWS)
- Latest
