Gibiyaan sa asawa nanigbas
CEBU, Philippines — Gitigbas sa lalaking hubog ang usa ka merchandiser nga naglingkod lang samtang nagtan-aw sa mga kauban nga nagduwa og volleyball sa Sitio Manguilamon, Barangay Jaclupan, Siyudad sa Talisay sa niaging adlaw.
Ang biktima nailhan nga si Uzzeil Bryan Abaquita, 21-anyos, ulitawo nga nagpuyo sa Sitio Cadicay, Barangay Lawaan 3 sa nahisgutang siyudad.
Samtang ang suspek mao si Marjun Jaberina, 28-anyos, ulitawo, construction worker nga nagpuyo sa maong dapit.
Sa inisyal nga imbestigasyon nasuta nga kuyog sa iyang mga amigo ang biktima sa maong lugar aron manulong og volleyball.
Apan samtang naglingkod ang biktima sa daplin nga nagtan-aw sa iyang mga kauban nga nagduwa og volleyball giduol siya sa suspek dayon gitigbas.
Samdan sa iyang duha ka kamot ang biktima kinsa gidala sa Talisay City Hospital.
Giingong naghubog ang suspek human siya gibiyaan sa iyang asawa dayon nakiglalis sab sa iyang igsuong lalaki nga pareho niya nga hubog.
Ang mga nirespondeng polis ang pakyas sa pagsikop sa suspek. (BANAT NEWS)
- Latest
