Largo: Di padakop nga buhi

CEBU, Philippines — Duha ka mga sibilyan ang matud pa nakatabang pagtultol sa panimay nga gitagoan ni Jessie Largo, kinsa maoy suspek sa pagpatay ni John Ronli Calizar, anak sa kanhi reporter niadtong Agosto 26 ning tuiga.

Si Supt. Jason Villamater, pangu sa kapulisan sa Siyudad sa Talisay miingon nga duha ka impormante ang naniid ni Largo.

Apan si Villamater nipasabot nga dili siya makatug-an kun makadawat ba gyud sa maong kantidad ang ilang impormante kay dili man siya maoy motudlo o modesisyon kun kinsa ang tagaan sa gisaad nga P200 mil sa Dakbayan sa Mandaue ug Talisay.

Si Villamater maoy nangulo sa operasyon uban sa iyang mga sakop ug sa Regional Special Operations Group (RSOG). Si Largo napusilan patay sa mga polis human niya gipusil si PO3 David Naraja Jr. diha sa nawong. Ang igsuon ni Largo nga si Jeson, 22, miingon nga grabeng selos ang hinungdan kun nganong nabuhat kadto sa igsuon. Si Ronli maoy nakarelasyon sa kanhi uyab ni Largo nga si Katherine Cabungcag.

Matud niya gikumbinsi gyud niya ang iyang maguwang nga motahan apan nagmagahi kini ug nipasiatab nga dili gyud siya padakop og buhi.

Ang mga silingan ni Largo nagpasalamat tungod sa ilang kabalaka nga maangin sila niini kay magsige kini panghasi ug magpaarak sa iyang armas.

Ang iyaan ni Largo, nga si Em-Em Abarquez nibisita sa lugar diin napatay ang pag-umangkon nipadayag nga buotan kaniadto ang pag-umangkon apan wala siya masayod kun nganong nalambigit kini sa mga krimen. Iya na lang nasayran nga napriso kini sa dihang nagpangidaron og 17

anyos ug dili pa dugay nakagawas karon tuiga. Giangkon niya nga sakit para kaniya ang kamatayon ni Largo apan iyang giampo ang kapahulayan sa dayon sa kalag niini. (BANAT NEWS)