Mouwan o dili magpadayon ang prosisyon

CEBU, Philippines — Si Archbishop Jose Palma sa Archdiocese of Cebu miingon nga bisan sa nagdanga-danga  nga bagyo ipadayon gihapon ang Grand Marian Procession nga ipahigayon karong alas-8 sa gabii nga manukad sa Cebu Provincial Capitol nga tak-opan sa Basilica Minore de Sto. Niño Pilgrim Center pinaagi sa usa ka santos nga misa.

Matud pa ni Palma, ang Oktobre 13, anibersaryo sa pagpakita sa Mahal nga Birhen sa Fatima ngadto sa tulo ka bata nga sila si Jacinta, Francisco ug Lucia sa Portugal ug ang Grand Marian procession usa sa pagtimaan niini.

Adunay 17 ka mga carroza gikan sa lain-laing parokya nga adunay mga nagkadaiyang titulo sa Mahal nga Birhen ang moapil niini.

Sumala pa ni Palma, ampo kita sa maayong panahon, apan kung maulanon gayud siya nagatuo nga ang mga Kristiyanos dili mahadlok sa ulan hinungdan rain or shine padayonon kini kay kausa ra kini mahitabo sulod sa usa ka gatos ka tuig.

Dugang pa ni Palma, ang pagpahigayon sa Penitential Procession usa kini ka pag-ampo ug pagrosaryo alang sa kalinaw tibuok kalibutan ug tibuok banay.

Ang pangulo sa Commission on the Laity Fe Barino, nitug-an nga preparado na ang tanan bisan unsa may lakat sa panahon. Ug miawhag sa mga manambong  pagdala og kandila, rosaryohan ug panyo nga puti.

Gitug-an ni PAGASA Director Engr. Oscar Tabada, nga makasinati ug mga pagtaligsik sa dakbayan sa Sugbo atol sa prosisyon. Sa laing bahin, nangandam na usab ang Dakbayan sa Lapu-Lapu sa umaabot nga kapistahan sa Birhe sa Regla karong Nobiyembre.

Si Mayor Paz Radaza miingon nga sagad sa mga kalihokan nga pagahimoon sa panahon sa gabii adto himuon sa Lapu-Lapu City Auditorium. (BANAT NEWS)