Bangi sa utlanan sa San Roque, Tangke moabot sa korte

CEBU, Philippines — Giangkon sa presidente sa Association of Barangay Councils (ABC) sa Dakbayan sa Talisay, Konsehal Raul Cabañero, nga lisud sa konseho ang pagdesisyon sa giilogan nga   utlanan sa Barangay Tangke ug San Roque.

Kini gumikan kay posibleng adunay mahiubos nga mga opisyal sa duha ka barangay ug kini makadaut kanila sa umaabot nga piniliay.

Ang kaso labot sa utlanan sa duha ka barangay ang anaa sa konseho sa dakbayan ug si Cabañero maoy nangulo sa paghimo og report.

Siya nagkanayon nga sa dili pa mahuman ang Oktubre moduso na siya sa iyang committee report ug iya kining itugyan ngadto sa konseho ang desisyon.

Iyang gihulagway nga “political issue” ang maong kaso.

Si Kapitan Elezeiver Abraham sa San Roque nagkanayon nga ilang paabuton ang desisyon sa konseho apan kun dili pabor kanila, hayan mapugos gyud sila og sang-at niini ngadto sa korte.

Matud niya nga naa sila’y mga dokumento sa mga yuta nga giangkon sa Barangay Tangke. Gani ang mga establisemento sa lugar diha man nagkuha og mga permit sa ilang barangay.

Samtang si Kapitan Perla Cabanes sa Barangay Tangke nitataw nga kun aduna’y ikapakitang dokumento ang San Roque hayan aduna man sab sila’y mga dokumento sa pagsuporta sa ilang pangangkon.

Nitumaw ang panag-ilog sa utlanan tali sa duha ka barangay dihang natukod ang Talisay City Fish Port nga hangtud karon wala pa gyud nagamit.

Si Kapitan Cabanes nipasabot nga bisan gani ang fish port gibutangan man og address nga Barangay Tangke.

Dugang pa niya nga kun dili mopabor ang desisyon sa konseho kanila, hayan iya kining hisgutan sa iyang konseho ug posible nga mag-atubang gyud sila sa mga opisyal sa Barangay San Roque.

Ang isyu sa utlanan sa duha ka barangay ang dugay na kaayo ug adunay report nga nagpanagana sa pagdesisyon ang mga karaang opisyal tungod kay basin og mapagan ang ilang karera sa politika. -/GMR (BANAT NEWS)