764 ka polis sa PRO-7 na-promote

CEBU, Philippines — Gipasidunggan ang 764 ka sakop sa kapolisan nga naglangkub sa 32 ka Police Commissioned Officers ug 732 ka Police Non-Commissioned Officers.

Nitambong sa seremonyas ang mga tinugyanan sa Command Group, Directorial Staff, Special Staff, Promotions Secretariat ingon man ang mga kaliwat ug asawa sa bag-ong na-promote sa ranggo.

Karong tuiga adunay 867 ka aplikante apan 764 lang niini ang nakapasar.

Hinoon tanang aplikante sa PCO ang nakapasar. Sa habig sa PNCO, niubos gikan sa 835 ngadto sa 732 ang nakapasar.

Ang promotion nagsugod sa Police Officer 2 ngadto na sa Chief Inspector.

Gibutyag ni Police Senior Superintendent Clarino Baja nga ang rason sa wala pagpasar sa uban mao ang kapakyas sa mga aplikante sa medical ug background investigation.

Si Police Regional Office-7 director, Chief Supt. Jose Mario Espino, niawhag sa kapolisan sa pagpadayon sa ilang trabaho aron sa pagpalambo sa serbisyo sa organisasyon.

Dugang ni Espino nga ang pagtinambayayongay ug maayong serbisyo sa kapolisan maoy tumong sa PNP.

Nanghinaut si Espino sa padayong pagpalapad sa kahibawo ug ka maayo sa bag-ong na-promote nga kapolisan.

Sa wala pa ang pagpasidungog, ang kanhi heneral sa kapolisan ug kasamtangang security consultant sa Carmen Copper Corporation nga si Lani-o Nerez ni-turn over sa usa ka Mahindra Enforcer ngadto sa kapolisan. (BANAT NEWS)