Laing ASEAN meeting himoon sa Bohol

CEBU, Philippines — Laing panagtagbo na usab sa mga nasud nga sakop sa Association of Southeast Asian Nations (ASEAN) ang himoon sunod buwan sa Lalawigan sa Bohol.

Gipahibawo ni PRO-7 Director, PCSupt. Jose Mario Espino nga ipahigayon na usab sa Bohol ang laing ASEAN Ministerial Meetings karong Oktubre 26 hangtud 27, kini bisan pa man sa nahitabong bomb scare sa usa ka tambalanan sa maong lalawigan.

Nasayran nga nakadawat ang otoridad og pagpanghulga nga adunay itanom nga bomba sa usa ka ospital sa Gallarde St., Brgy. Poblacion Dos, Tagbilaran City niadtong niaging semana atol sa adlaw nga opisyal nga gisugdan ang kalihukan, apan negatibo kini. Unang gipahigayon ang ASEAN Meetings sa Bohol niadtong Abril ug giusban niadtong Septiyembre 19 hangtud 21 diin dul-an sa 200 ka delegado ang nanambong gikan sa 12 ka mga miyembrong nasud.

Kahinumduman nga niabot sa Tubigon, Bohol ang mga bandidong Abu Sayyaf atol sa maong kalihukan niadtong Abril kinsa nagplano nga motisok og kasamok sa maong okasyon.

Apan taliwala sa maong hitabo, hugot ang pagsalig ni Espino nga luwas ang Bohol alang sa mga delegado sa ASEAN. "We could say that Bohol is still a place for having conferences." matud ni Espino.

Dugang niya nga hapsay ra nga nakauli sa ilang tagsa-tagsa ka mga nasud ang tanang delegado niadtong Biyernes. - /DILT) (BANAT NEWS)