Igsuon sa “narco-cop” nadakpan
CEBU, Philippines — Igsuon sa kontrobersyal nga polis nga giapil sa listahan ni Pres. Duterte sa mga narco-cops nadakpan sa kapulisan sa Siyudad sa Talisay sa gihimong buy-bust operation uban sa unom ka durugista diha sa Zone 5 Florida Ville, Barangay Dumlog, niadtong Biyernes sa gabii.
Una niini, ang kapulisan nakadawat og reklamo bahin sa illegal nga kalihukan ni Manuel Campo alyas ManMan, 38, taga Sitio Tabay, Barangay Dumlog sa maong siyudad.
Ang operatiba nakapalit og drugas ni Campo maong ila kining naposasan ug nakuhaan og 19 ka gagmay nga paketeng shabu lakip na ang KG-9 submachine pistol nga adunay duha ka magazines nga pulos kargado og tag 25 ka bala kada usa, cellphone, cash nga P10 mil.
Matud pa gitultolan usab ni Campo ang mga polis ngadto sa iyang supplier nga si Eleazar Ian Cortes alyas Ian, 40, nga giingong igsuon sa polis nga gipangalanan ni Duterte nga drug protector.
Matud pa ni PO2 James Cabrillos sa Talisay City Police Station gidala sila ni Campo sa gihimutangan ni Cortes didto sa Zone 5 Florida Ville, Barangay Dumlog ug didto gihimo usab ang laing buy-bust operation hinungdan nga kini nadakpan sab.
Nakuhaan kini og 22 ka medium nga pakete sa ugang dahon sa marijuana, timbangan, .357 revolver nga adunay duha ka bala, S&W Drontier nga aduna’y tulo ka bala sa M16.
Nalakip sa pagkasikop nga nakuhaan og drug paraphernalia sila si Marvin Cortes, 21 , nagpuyo sa Tres de Abril, Barangay Labangon sa Siyudad sa Sugbo; Rolando Sentillas, 38, taga Barangay Dumlog; Dante Cumbre Jr., 35, nga taga Barangay Dumlog; Ely Ebajan, 29, taga Urgello, Cebu City ug si Baby Girl Resil, 34, taga lungsod sa Minglanilla.
Ang tanang drugas nga nakumpiska sa mga operatiba muabot ang timbang sa 30.7 gramos nga aduna’y balor nga P103,938 mil. Asoy pa ni Supt. Jason Villamater, pangu sa kapulisan sa dakbayan sa Talisay nga ilang susihon ang background sa mga dinakpan kun nalambigit ba kini sa ubang mga krimen sa siyudad.
Si Cortes ang igsuon sa polis nga apil nga gipanganlan ni Duterte nga nalambigit sa ginadiling drugas. - /IBM) (BANAT NEWS)
- Latest
