72 menor de edad gihipos

CEBU, Philippines — Gihingusgan sa kapolisan sa Station 6 ang curfew batok sa mga menor de edad nga naglaroy-laroy diha sa Barangay Sawang Calero ning dakbayan sa Sugbo ug gihipos ang mga kabataang wala diha sa ilang mga panimalay bisan lawom na ang kagabhion.

Miabot ngadto sa 72 ka menor de edad nga naglibudsuroy ang nadala sa kapolisan diha sa ilang buhatan diin 12- anyos ang edad sa pinakabata niadtong Miyerkules sa gabii.

Matud pa sa hepe sa maong estasyonan sa polis nga si Chief Insp. Keith Allan Andaya nga kadaghanang dinakpan naglibudsuroy sa Barangay Sawang Calero ug San Nicholas Proper. Apan ilang nasayran nga kadaghanan aning mga bataa anha gyud diay nagpuyo sa aseras.

Gibutyag sa maong hepe nga kun katulo na masagop ang mga bata tungod sa curfew, gikinahanglang mag-community service ang ginikanan niini isip silot sa wala pagbantay sa ilang mga anak.Alas 10 sa gabii gisugdan  ang pagpanghipos sa maong mga bata. “Ang uban nagduwa pa og basket unya ang uban kay nag-estambay lang kuyog mga dagko. Ok ra man mag-estambay pero kailangan naay kuyog nga parent or guardian,” sumala pa ni Andaya.

Gitugyan sa mga otoridad sa mga barangay diin nasagop ang maong mga bata ug gibuhian ra sila dayon pag alas kwatro sa kaadlawon. Gitug-an usab ni Andaya nga wala nisugot ang social workers gikan sa Department of Social Welfare and Development nga kuyogan sila sa operasyon kay nangrason sila nga lapas na sa oras sa ilang tingtrabaho. (BANAT NEWS)