Day of Protest malinawon

CEBU, Philippines — Ang direktor sa Cebu City Police Office Joel Doria mibutyag nga malinawon ang gipahigayong rally sa Plaza Independencia diin gibana-banang kapin 100 ka buok ang nanambong.

Gikan sa dalan Colon, nidiretso sa Plaza Independencia ang maong mga raliyista nga nahuman dayon pag alas 11:15 sa udto.

Bisan pa man nga gimandoan ni Presidente Rodrigo ‘Digong’ Duterte nga dili kinahanglan magpatunga ang kapolisan sa himuong protesta, gi-monitor gihapon sa kapolisan   ang lihok sa mga nagprotesta alang sa ilang seguridad.

Butyag sa maong direktor nga wala ra nakaapekto sa trapiko ang maong welga tungod kay anaa ra sila nagtapok sulod sa plaza hangtud nga nahuman kini.

Kagahapon ang ika- 45 nga anibersaryo sa pagdeklarar og Martial Law ni kanhi Presidente Ferdinand Marcos.

Hinungdan nga gideklarar pud sa kasamtangang presidente nga si Duterte ang maong adlaw nga National Day of Protest isip pagselebrar sa demokrasya sa Pilipinas. Giawhag ni Duterte ang tanan sa pagprotesta kay katungod nila ang pagpadayag.

Samtang gihulagway ni Konsehal Dave Tumulak, Chairman sa Committee on Public Order and Safety   sa kamalinawon sa kalihokan kagahapon.

Ang nagpahigayon og demonstrasyon mao ang Pagkakaisa ng mga Samahan ng mga Tsuper at Operators Nationwide (PISTON) Cebu Chapter, Anak Bayan, Sanlakas ug uban pa.

Daan nang kagamhanan sa siyudad ang mga raliyista nga dili momugna og kasamok ug motuman lang gyud sa lagda sa trapiko ug dili maghugaw-hugaw.

Sa laing bahin, ang kapulisan sa Siyudad sa Talisay nimuntar og checkpoint sa nagkalain-laing barangay sa pag- obserbar sa National Day of Protest kagahapon. (BANAT NEWS)