Polis nangilkil?

CEBU, Philippines — Mopahigayon og imbestigasyon ang hepe sa kapolisan Dakbayan sa Talisay Police Supt. Jason Villamater, may kalabutan sa post sa usa ka kanhi reporter sa pamantalaan nga adunay polis nga nangilkil og P200 mil bugti sa kagawasan sa usa ka dinakpan may kalabutan sa usa ka tawo nalambigit sa ilegal nga drugas.

Matud pa sa post sa kanhi reporter ang maong polis nalakip sa walo ka mga polis nga protektor sa mga drug lord sa siyudad.

Apan si Villamater sa iyang bahin nibutyag nga legitimate ang ilang police operations pagkasikop kang Feliciano Bucao, alyas Ciano, 50, ug bag-ong naila nga nalambigit sa ilegal nga drugas.

Sumala pa ni Villamater, magpaabot siya sa report sa iyang mga sakop nga nipahigayon sa maong operation. Dugang pa ni Villamater, iya usab susihon kung unsa nga level si Bucao, ug kung aduna ba kini mga dautan nga record sa dakbayan.  Gitug-an ni Villamater, nakuhaan si Bucao og drugas nga mobalor og P15 mil.

Si Villamater, nitug-an nga palawman niya ang imbestigasyon may kalabotan sa maong alegasyon ug kung mapamatud-an niya nga adunay kamatuoran ang maong akusasyon andam niyang pasakaan og mga kaso ug ipatangtang sa serbisyo ang maong polis.

Giawhag ni Villamater ang katawhan nga isumbong sa ilang buhatan kung adunay mga sakop niya ang niapil sa mga binuang.

Suway nga gitawgan sa Banat News ang anak sa dinakpan apan wala siyay kasayoran niini tungod kay lahi ug gipuy-an ang iyang amahan. (BANAT NEWS)