Police: Media hatagan gihapon og spot reports

CEBU, Philippines — Giklaro sa Philippine National Police (PNP) pinaagi sa usa ka press statement ang pasiunang report nga dili na pahatagan og spot reports ang mga miyembro sa media human kini sugata og mga negatibong reaksyon.

Ang usa ka spot report naghisgot sa mga pasiunang detalye sa usa ka insidente nga maoy basehan sa media aron maghimo og kaugalingong panukiduki aron mapanindot ang ilang balita.

Ang maong isyu bahin sa pagdili paghatag sa kopya sa spot reports sa kapolisan nagsugod dihang adunay text memorandum nga mikatap sa pagdili og paghatag niini.

“The Philippine National Police clarified that there is no directive from PNP Chief Police Director General Ronald Dela Rosa  prohibiting the members of the media to access reports. The PNP leadership has not issued a new memorandum on policies and guidelines related to criminal investigation and media relations,” sigon pa sa pamahayag.

Dugang gipasalig sa PNP nga padayon gihapon nga makakuha og spot reports ang mga reporters aron pagpalig-on sa transparency ug accountability sa mga polis.

“Therefore, members of the media can access spot reports with proper requests for the sake of transparency and accountability,” sigon pa sa maong pamahayag.

Human mibuto ang maong isyu miluwat dayon og nagkalainlaing mga  pamahayag sa pagsupak ang mga kadagkuan sa mga organisasyon sa mga tigbalita tungod sa kabalaka nga mahikawan ang publiko sa ilang katungod nga masayod sa mga panghitabo sa ilang palibot. Mao usab kini ang mamahimo unyang hinungdan nga mosamot kawala ang pagsalig sa katawhan ngadto sa kapolisan.

Si Chief Superintendent Jose Mario Espino, regional director sa kapolisan sa Central Visayas miingon nga paabuton nila ang kopya sa memorandum una pa siya mopakanaog og dugang direktiba bahin sa isyu.

Mipadangat na sa niaging adlaw ang dakong opisyal sa PNP, Police Director Augusto Marquez of the Directorate for Investigation and Detective Management (DIDM) sa Camp Crame nga padayon makapangayo og spot reports ang reporters ngadto sa kapulisan.

Giklaro nuon niya nga kung intensyon gani sa pagkuha og report o uban pang statistics ang tumong sa mga reporter kinahanglan  na nila mangayo og permiso sa Office of the President. - /IBM) (BANAT NEWS)