Mga pantalan gihugtan pagbantay batok bird flu

CEBU, Philippines - Sukad kagahapon nagpadala na ang Kapitolyo og mga personnel gikan sa Provincial Veterinary Office ngadto sa mga pantalan pagsiguro nga wala’y mga karne ilabina sa manok ang makasulod sa lalawigan sa Sugbo nga posibleng magdala og avian flu.

Dili momenus siyam ka mga teams gikan sa PVO ang gi-deploy sukad kagahapon kon diin matag team langkoban og duha ngadto sa tulo ka technical personnel ug veterinarian.

Ang maong mga personnel gipadala sa mga pantalan sa Dakbayan sa Bogo, lungsod sa Daan Bantayan, Tabuelan, Santander, Medellin, Samboan, San Remigio, Bantayan Island ug Pilar sa Camotes Island.

Tanang livestock o hayopan nga ibiyahe pagawas ug pasulod sa probinsya ilabina ang mga langgam ug karne sama sa manok susihon ug kon pasado mo-isyu ang veterinarian og Veterinary Health certificate.

Gihangyo usab ni Gob. Hilario Davide III ang mga local government units nga mo-deploy usab og mga tawo ngadto sa ilang mga pantalan aron matabangan ang siyudad nga mapanalipdan gikan sa bird flu. - Aiya Lapera, SWU-Phinma Intern/EIM) (BANAT NEWS)