Gubat vs dengue gipangusgan

CEBU, Philippines - Tungod sa nagkadaghang natakboyan sa sakit nga dengue sa dakbayan sa Talisay, ang barangay Poblacion mihingusog karon sa ilang kampanya batok sa maong sakit pinaagi sa paghimo na og senemanang  cleanup drives sa ilang lugar.

Ang mga opisyales sa maong barangay kauban ang mga nagpakabana nga mga lumulupyo sa nagkadaiyang sitio nagtinabangay sa paglimpyo sa ilang palibot.

Ang Talisay nahimutang sa ikatulo sa listahan sa lalawigan sa Sugbo nga adunay kinadaghanan  og nakalas tungod sa sakit nga dengue ug ikaunom sa listahan sa kinadaghanan sa natakboyan niini karong tuiga.

Hinuon walay nakalas nga taga Poblacion tungod sa dengue apan aduna silay dili momenus sa 20 ka mga kaso. Si Megie Donan-Hervas, konsehal sa maong barangay  miingon nga himoon na nila kining senemana ang pagpanglimpyo aron maanad ang mga tawo nga mangunay sa paghinlo sa ilang palibot.

Ang mga lamok nga nagdala og makamatay nga sakit nga dengue mahimong managhan gumikan sa kahugaw sa palibot.  Gawas pa niana, paborito niining lugar mao ang napasagdan nga tubig nga nagpundo. Apil sa ilang itloganan mao ang mga tubig sa mga kanal nga diin nagbara na ang tubig tungod sa kadaghan sa nagbara nga basura ug lapok.  Giawhag ni Donan-Hervas ang mga molupyo nga dili balewalaon ang pagpanglimpyo sa ilang palibot, kinahanglan gyud silang motabang tungod kay ang sakit nga dengue walay pilion, dato man o pobre ug ang kalimpyo sa palibot maoy usa sa pangkontra niini.

Ang mga tinugyanan sa City Health Office sa dakbayan nagsugod na pagsuroy sa kabarangayan aron bakunahan og anti-dengue nga tambal ang mga batang nag-edad og nuwebe ngadto sa 14 anyos. (BANAT NEWS)