Preso nisuway’g eskapo napusilan

CEBU, Philippines – Piniriso sa Cebu City Jail nga giingong gihulga nga patyon sa iyang mga kaubanan may labot sa pagpalusot og kontrabando sa maong prisohan misuway unta og eskapo apan way swerte kay napusilan hinuon sa jailguards ug nadakpan. Giila ang maong piniriso nga si Johnson Kintanar, 31 anyos, residente sa San Jose, Barangay Lahug ning siyudad ug dunay kasong 4- counts qualified theft pinaagi sa falsification of commercial documents.

Nagkanayon si Superintendent Arnel Peralta Jail Warden sa Cebu City Jail pasado alas 7 kagahapon sa buntag ang tower guard mikanaog kay nangita sa iyang karelibo ug giingong didto misalisi si Kintanar. Matud pa misaka kini sa tanke sa tubig ug milayat paingon sa female dormitory ug didto na kini nasakpan.

 Sigon pa ni Peralta sa inisyal nilang pagpangutana, si Kintanar gikatahong nangangkon nga nakadawat kini og mga hulga gikan sa mga kaubang priso kay nagasto niya ang kwarta nga gihatag sa usa ka “Commander Ado” nga nagkantidad og kapin sa P4 mil. Giingong ibayad unta kini sa taga gawas nga tawo nga mosugot nga maoy molabay og sigarilyo padulong sa sulod sa pasilidad.

Si Commander Ado mao kini ang over-all commander ug naa napriso sa main building sa City Jail. Giingong dihang gipaninglan si Kintanar kon asa na ang kwarta wala na kini ikahatag kay iya nang nagasto hinungdan nga gihulga siya nga patyon.

Sa pag-eskapo ni Kintanar nasikop ra usab kini dayon human dunay nakasinggit nga dunay nilayat sa tower six ug naalarma ang mga outgoing personnel ug milipot dayon sa likod nga bahin ug didto nadakpan ang piniriso. Matod ni Peralta bisan og duna nay warning shot ang mga jail officers giingong midagan gihapon si Kintanar ug matod pa misukol kini hinungdan nga napugos ang mga jail officer sa pagpusil sa iyang tiil.

“Dili raman nuon kaayo kritikal, maong naa siya sa infirmary para ini’g ka Monday basin og dili holiday mangayo ta og court order para ibalhin siya sa tambalanan,” asoy pa ni Peralta.

Bisan nuon og menus na lang kining mga kontrabando nga suway ipalusot sulod sa City Jail si Peralta miingon nga gihingusgan gihapon nila ang ilang surveillance hasta niining pagpalusot og sigarilyo.

Mahitungod usab niadtong Commander Ado nga matod pa gihinganlan ni Kintanar si Peralta miasoy nga ilaha kining i-refer sa ilang Disciplinary Machinery Board aron masuta kon unsay maayong buhaton.

Nakaangkon usab og samad sa kalawasan si Kintanar tungod sa paglayat niini kini bisan og dunay barbed wires.

Kahinumduman nga sa miaging mga semana usa usab ka piniriso sa City Jail ang mieskapo apan misurender dayon diin ang iyang rason sa pagpuga mao ang giingong dili maayong pagtratar sa mga jail officer sa ila nga mga piniriso. -/EIM (BANAT NEWS)