Ylanan nibalik na gyud sa Alayon
CEBU, Philippines - Wala na’y nagpabiling oposisyon sa konseho sa Dakbayan sa Talisay human si Konsehal Valeriano Ylanan nibalik na sa sabakan sa partido sa mayoriya. Sa iyang privilege speech, gipadayag niya ang iyang pormal nga pagtapon sa Alayon nga partido nga gipanguluhan ni Mayor Eduardo Gullas.
Gikan sa pagsugod ni Ylanan sa politika sakop na siya sa partidong Alayon apan nibalhin siya og laing partido human siya nakadaug.
Sa ikaduha niyang termino nikuyog siya sa kanhi mayor Johnny de los Reyes sa Liberal Party apan sa ilang pagdaug dali ra sab silang nabuak nga grupo hangtud nga sa ikatulo niyang pagdagan siya lang ang nilusot nga konsehal sa grupo sa Liberal Party.
Apan ning bag-uhay siya nipahibawo nga nibalik na siya sa partidong Alayon kinsa mayoriya karon sa administrasyon.
Siya nipadayag nga karon pa siya nakasinati og kalipay ug katagbawan sa iyang pagka-konsehal uban sa iyang mga kaubanan sa konseho.
Iyang gitataw nga dako niyang kalipay nga gidapit siya ni Gullas nga mobalik sa iyang grupo. Dugang pa niya nga ang iyang pagbalik sa Alayon nagpasabot nga dugang serbisyo, proyekto ug kaayuhan sa mga Talisaynon. (BANAT NEWS)
- Latest