Si Peter Lim gyud ang gitumbok

CEBU, Philippines - Ang deputy chief sa Crime Investigation and Detection Group-7 nga si Chief Inspector Hector Amancia miingon nga nagkatakdo ang ilang imbestigasyon ug ang pasangil ni Presidente Rodrigo Duterte nga ang negosyanteng si Peter Lim gyud ang usa sa dagko nga mga drug lord sa Pilipinas.

Niadtong Lunes, mihimakak ang abogado ni Lim nga si Majilyn Loja sa pasangil batok sa iyang kliyente. Matud niya dili gyud si Lim ang gipasabot ni Duterte nga Peter Lim nga usa ka drug lord ug dunay alyas nga Jaguar.

Apan si Amancia kombinsido base sa resulta sa ilang imbestigasyon batok ni Lim nga mao gyud kini ang gitumbok ni Duterte.

Iyang gitataw nga gawas sa mga ebidensya nga ilang gihuptan sa ilang gihimong imbestigasyon, giapil nila og duso sa national headquarters ug sa Department of Justice ang resulta sa congressional hearing batok ni Lim niadtong tuig 2001.

“They have all the right to say nga di na mao ang client nga gi-investigate. The unit nga naghimo sa investigation, gitumbok gyud na nga siya gyud na nga Peter Lim ang atong gi-undergo og investigation,” si Amancia miingon.

Kaniadto giimbitar si Lim ug igsuon niining si Wellington sa congressional inquiry nga gipatawag sa kanhi kongresista sa Sugbo Antonio Cuenco bahin sa pagpasulod og ilegal nga drugas dinhi sa nasud.

Adunay duha ka mga testigos nga kanhi empleyado sa magsuong Lim  nga mitumbok kaniya nga nagpalusot og drugas dinhi sa Sugbo.

Kusganon kining gihimakak sa magsuong Lim. Gitak-opan ang maong inquiry nga wala mapamatud-i ang pasangil kaniya. Ang duha ka state witnesses nga silang Bernard Liu ug Ananias Dy gipamusil patay paglabay sa pipila ka tuig.

Si Dy gipusil sa Barangay Labangon niadtong 2006 samtang si Liu natipi sa sulod sa iyang panimalay sa Barangay Tangke, Dakbayan sa Talisay niadtong tuig 2011, wa pa masulbad hangtud karon ang maong mga kaso. (BANAT NEWS)