Padulong matulog gipusil sa nag-bonnet
CEBU, Philippines - Grabeng naangol ang usa ka lalaki nga padulong na unta nga matulog sa lawak sa iyang panimalay dihang gipusil sa wala mailhing tawo nga nag-bonnet, alas 11 pasado ang takna sa niaging gabii sa Sitio Pulang Yuta, Barangay Looc, Dakbayan sa Danao.
Giila ni SPO1 Arnold Labine sa Danao City Police Station ang biktima nga si Ricky Morales Vasquez, 29-anyos.
Giingong naghigda na unta ang biktima sa iyang lawak apan kalit lang nabati niini nga adunay nanuktok sa pultahan.
Dugang ni SPO1 Labine nga daling nibangon ang biktima ug giablihan ang pultahan aron susihon ang nanuktok.
Sa pag-abli niini sa pultahan, nakita niini ang nag-bonnet nga lalaki nga naghupot og armas nga wa pa matinong kalibre ug namusil sa biktima sa tulo ka higayon.
Human sa hitabo, daling nisibat ang mamumuno ug ang biktima nga nakabaton og samad pinusilan sa iyang abaga, bukton ug kamot, daling gidala sa iyang mga kabanay sa Danao Provincial Hospital.
Si SPO1 Labine niingon nga human sa pasiunang pagtambal sa mga doktor sa biktima, dali usab kining gibalhin sa Vicente Sotto Memorial Medical Center sa Dakbayan sa Sugbo alang sa dugang pag-atiman. (BANAT NEWS)
- Latest
