Banat ( Leaderboard Top ), pagematch: 1, sectionmatch: 1

Nagmotor gipatay sa laing nagmotor

CEBU, Philippines - Gipusil patay ang usa ka 30-anyos nga lalaki sa duha ka wa pa mailhing mamumuno nga nagsakay og motorsiklo uban sa iyang inahan ug dos anyos nga anak buyon sa Sitio Guiwanon, Barangay Poblacion sa Lungsod sa Dalaguete   niadtong Biyernes sa gabii.

Ang gipatay giila nga si Chernobyl Olorvida Bejarasco, residente sa nahisgutang barangay.

Dali nga gidala sa ospital ang biktima tungod sa naangkong usa ka samad pinusilan sa pus-on apan gideklarar kining dead on arrival sa nag-atiman nga doktor.

Ang imbestigador sa maong kaso nga si PO3 Arnel Calisang niingon nga sa inisyal nilang imbestigasyon, nasuta nga samtang anaa sa karsada ang biktima uban sa iyang inahan ug anak, kalit nga niabot ang duha ka lalaki nga nagsakay sab og motorsiklo ang mibabag kanila ug namusil.

Ang inahan nga nakasaksi sa krimen, wala makamay-ong sa nawong sa maong mga lalaki kay gawas nga ngitngit, nagtaptap pa gyud kini sa ilang mga nawong ug nagsul-ob og kalo.

"Nahalimbuwad gyud sila oy (si Isabelita ug ang bata) apan wala ray major injuries. Ang bata ray nagarasan," tataw sa polis.

Iyang gibutyag nga usa sa ilang gitutokang anggulo sa krimen mao ang pagkalambigit sa biktima sa usa ka fraternity.

Matud pa nga posibleng duna kini kaaway gikan sa laing fraternity apan kun tinuod man kini, mao kini ang permirong insidente nga naglambigit og fraternity.

Laing anggulo nga ilang gisusi mao ang pagkalambigit sa druga niini kay gikatahapang manuyopay kini og shabu matud pa sa imbestigador.

Kasamtangan pa nilang gisubay ang mga mamumuno pinaagi sa pag-ukay sa mga CCTV camera sa mga dalan nga posibleng ilang giagian. (BANAT NEWS)

  • Follow Us: