Niluwas sa duha ka bata maoy nalumos

CEBU, Philippines - Imbis siya maoy nitabang sa duha ka batang padulong malumos, ang konduktor na hinuon ang nalumos samtang nangaligo sa Larawan Beach sa Barangay Poblacion, Dakbayan sa Talisay niadtong Miyerkules sa udto.

Na-missing pa niadtong higayona si Benjamin Purisima, 27, minyo nga taga Barangay Maghaway sa maong siyudad.

Apan nakit-an ang iyang patay’ng lawas nga naglutaw sa pagka-sunod nga adlaw na.

Matud ni Aurelia Purisima, inahan sa namatay, nga niuban ang iyang anak sa pamilya sa amo tungod kay birthday sa bata niini.

Nipugos nga nangaligo ang grupo bisan pa og kusog ang bawod hangtud nga duha ka bata, usa niini mao ang anak sa iyang amo, ang naglisud sa paglangoy hinungdan nga iya kining giluwas.

Apan si Alvin Santillana, pangulo sa City Disaster Risk Reduction and Management Office, nibutyag nga posibleng nahapak sa bawod si Purisima ug naigo sa mga bato hangtud nga siya nalumos.

Ang inahan sa namatay nihulagway nga dili makamao molangoy ang iyang bata.

Naluwas tuod ang duha ka bata apan si Purisima maoy ilang gipangita tungod kay nawagtang kini.

Si Esik Nuñez, residente sa lugar, ang nakakita sa patay’ng lawas sa biktima nga naglutaw-lutaw hangtud nga ila kining giguyod sa daplin. Ang pamilya sa biktima maoy niila sa patay’ng lawas.

Nipahimangno si Santillana sa tanan nga likayan lang una ang pagkaligo sa kadagatan tungod kay dili pa maayo ang panahon karon. (BANAT NEWS)