Nagpusil sa pizza parlor worker nitahan

CEBU, Philippines - Suspetsado pagpusil patay sa usa ka trabahante sa usa ka pizza parlor nga nag-atang og sakyanan padulong unta motrabaho sa may Barangay Carreta ning Dakbayan sa Sugbo nisurender na sa kapolisan.

Ang suspek mao si Rolando Ybañez, 34, taga Barangay Lorega-San Miguel ning dakbayan kinsa miangkong siya maoy nipusil patay kang Crisanto Amoranto, 21, nga nagpuyo sa silingan ra nilang barangay diha  sa Sitio Laray, Barangay Carreta. Nag-atang ang biktima og masakyan padulong sa trabahoan alas 4:30 sa hapon niadtong adlaw nga Miyerkules sa dihang kalit niabot ang suspek ug  gipusil kini makausa diha sa ulo nga maoy naingnan sa hinanali niini nga kamatayon.

Si Ybañez nangangkon nga dako iyang kalagot kang Amoranto kay gidapog siya niini duha ka bulan ang nilabay hinungdan iya kining gibawsan.

Sumala pa ni Ybañez, inayo niya ang maong armas nga gubaon maoy iyang gigamit pagpusil kang Amoranto ug iyaha kining gilabay human sa krimen.

Iya usab giklaro nga dili siya tulisan ug wala usab siya nakasuyop sa dihang iyang gihimo ang krimen. (BANAT NEWS)