Angkas nag-operate na

CEBU, Philippines - Nag-operate na ang Angkas, usa ka app diin makakontak na og habal-habal aron masakyan niadtong magdali sa biyahe sa Siyudad sa Sugbo.

Nagkanayon si Arnel Tancinco, executive assistant ni Cebu City Mayor Tomas Osmeña, nga sigun sa operations officer sa Angkas nga nahuman na sila sa pagpahigayon og beta testing ug makita na ang ilang mga     riders sa kadalanan sa siyudad.

Aron makagamit sa serbisyo sa Angkas kinahanglan nga mo-download sa Angkas application aron makapa-book online kung gusto mosakay.

Ang beta testing sama sa usa ka dry-run diin ang driver ipaubos sa evaluation kun makatuman ba kini sa sistema ug paagi sanglit usa man kini sa protocol nga gipatuman sa system supplier aron maseguro ang kaluwasan sa mga pasahero.

Matud ni Tancinco nga ang gobiyerno ang napakyas sa pag-monitor sa mga habal-habal nga motuman sa safety regulation nga nalatid sa balaud.

Naghuwat na lang ang Angkas sa schedule ni Osmeña aron hingpit na nila kining ilusad.

Nanghinaut si Tancinco nga pinaagi niini maka-enganyo kini sa ubang mga habal-habal drivers sa siyudad aron moapil apan giklaro hinoon niya nga dili kini pugsanay ug kadtong gusto lang moapil.

Gihulagway ni Tancinco nga nindot ang maong operasyon tungod kay usa kini ka secured system kay ang kalihukan, booking ug rota ma-record ug ang identity sa rider makita sa pasahero.

Kun dunay pasahero nga moreklamo, mailhan dayon ang drayber.

Tungod kay wala pay balaud sa pag-regulate sa habal-habal, si Tancinco niingon nga ang mahimo sa dakbayan mao ang pag-monitor ug paghatag og kaseguraduhan sa mga pasahero nga luwas ang ilang pagsakay.

Ang Grab Express nga alang sa paghatud sa mga dokumento ug uban pang gamit ang magpahigayon sab og beta testing. (BANAT NEWS)