NPAs sa Negros Oriental gibantayan
CEBU, Philippines - Nagpahigayon og preventive patrols sa nagkadaiyang lugar sa Central Visayas ang Police Regional Office-7 tungod sa report nga nanglayas ang mga gidudahang New Peoples’ Army gikan sa Negros Oriental padung sa kasikbit nga mga probinsya sa Central Visayas.
Matud pa ni Chief Supt. Jose Mario Espino nakadawat sila og impormasyon nga ang mga nang-ambush sa unom ka pulis sa Guihulngan City niadtong Biyernes nanakay og pumpboats pagawas sa maong probinsya.
“It is an intel report. Even if it is an intel report we have to prepare. We are still validating,” matud pa sa direktor. Nasayran nga namatay ang unom ka mga pulis lakip na ang hepe sa Guihulngan Police station nga si Police chief Superintendent Arnel Arpon samtang samdan ang laing tulo niya ka mga sakop.
Miresponde sila sa tawag sa konsehal sa maong dakbayan nga si Konsehal Edison dela Rita kauban ang iyang driver nga gi-ambush sa mga New People’s Army (NPA) sa Barangay Magsaysay, Guihulngan City niadtong Biyernes sa buntag.
Si Espino wa mosalikway sa posibilidad nga maabot kini sa Sugbo ang maong mga grupo kay mao kini ang pinakaduol sa Negros.
“Based sa reports from AFP (Armed Forces of the Philippines) and PNP (Philippine National Police), wala tayong kinatatakot na magkakaroon ng spill over pero we are not taking chances,” si Espino miingon.
Ang Cebu Provincial Police Office mipahigayon na og hugot nga seguridad sa kadagatan sa probinsya. (BANAT NEWS)
- Latest
