Kiamco sablay kay Boening
US OPEN 10-BALL C’SHIP
MANILA, Philippines - Naibulsa ni Guangzhou Asian Games silver medalist Warren Kiamco ang runner-up trophy sa 2017 US Open 10-Ball Championship na ginanap sa Griff’s Activity Center sa Las Vegas, Nevada.
Nagtamo ang Pinoy cue master ng 5-9 kabiguan sa kamay ni Shane Van Boening sa championship round upang magkasya sa $8,000 konsolasyon.
Naiuwi naman ni Van Boening ang tumataginting na $15,000 top prize.
Hindi naging madali ang tinahak na daan ni Kiamco bago makapasok sa finals.
Nagtala muna si Kiamco ng 9-1 panalo laban kay Molrudee Kasemchaiyar sa first round (9-1), Denis Grabe sa second round (9-7), Vilmos Foldes sa third round (9-8), Mario He sa fourth round (9-8) at Alex Pagulayan sa quarterfinals (9-3) bago yumuko kay Van Boening sa semifinals ng winner’s bracket (4-9).
Sa loser’s side, tinalo ni Kiamco ang kababayang si Roberto Gomez sa semifinals sa iskor na 9-7 upang maisaayos ang muling pakikipagtuos kay Van Boening sa championship.
Pumangatlo lamang si Gomez ngunit hindi ito uuwing luhaan dahil nagkamit ito ng $5,000 premyo.
Nasa ikaapat naman si Alex Pagulayan para sa $3,000 konsolasyon habang ikalima si Lee Vann Corteza na nakasiguro naman ng $1,700.
Sunod na aarangkada sina Kiamco, Gomez, Pagulayan at Corteza sa US Open 8-Ball Championship na idaraos sa parehong venue mula Hulyo 29 hanggang 31.
Makakasama ng apat na cue masters sina dating world champions Dennis Orcollo at Francisco Django Bustamante.
Matapos ang US Open 8-Ball, agad na babalik sa Pilipinas ang delegasyon para naman sa 2017 Southeast Asian Games na idaraos sa Agosto 19 hanggang 30 sa Kuala Lumpur, Malaysia.
- Latest