Abangan sa merkado sa Tabunok way umento

CEBU, Philippines - Wala’y umento sa abangan sa merkado sa Tabunok, Dakbayan sa Talisay.

Kini maoy gipahibawo ni City Treasurer Emma Macuto kinsa niingon nga mao kini ang gusto ni Mayor Eduardo Gullas ug igo lang sila nga motuman.

Matud niya nga adunay mga stalls nga ang abangan P4,500 ang buwan samtang adunay P7.50 matag adlaw sa matag metro kwadrado kun diin adunay gidak-on nga 28 ngadto sa 30-metro kwadrado.

Sundon ni Macuto mao ang ilang Revenue Tax Code nga naaprobahan niadtong tuig 2011.

Sigun pa niya nga barato kaayo ang ilang abangan nga maoy gusto sa mayor hinuon ila unya kining usbon ang ilang Revenue Tax Code aron patas-an ang uban og buhis apan dili ang abangan sa merkado.

Sayo niini si Gullas nipadayag nga dili kinahanglan ang pagpasaka sa bayronon sa abangan tungod kay wala man sila nangutang aron nga matukod ang modernong merkado sa Tabunok.

Samtang si City Engineer Gamaliel Vicente Jr. nitataw nga adunay 91 ka stalls nga natukod sa bag-ong edipisyo samtang 40 lang ang gibalik sa naandan nga pwesto.

Mahimo pa sila nga modawat og mga bag-ong aplikante nga gustong maninda sa merkado sa Tabunok basta lang sila makasunod sa tanang gikinahanglan sa siyudad. (BANAT NEWS)