Giyera batok drugas malampuson
CEBU, Philippines – Giangkon sa director sa Philippine Drug Enforcement Agency-7, Atty. Yogi Felimon Ruiz, nga malampuson ang giyera sa gobiyerno batok sa druga human anam-anam nga nasikop ang mga personalidad niini.
Sa dul-an usa na ka tuig sa administrasyon ni Presidente Rodrigo Duterte, si Ruiz niingon nga malampuson ang ilang pagpakigbatok sa drugas.
“Yes, we are very successful, if you look at the situations karon, ang mga bigtime players kay nagsi-undangay na sila, so ang nagpabilin kato na lang gyud ang mga nag-think nga untouchable sila pero right now, sa administration ni Duterte walay untouchable. Sa 19 nga gigukod, we are down to 7 na lang,” matud ni Ruiz.
Dugang niya nga ang ilang mga nadakpan nagpamatuod lang nga dili lang mga small time nga mga pushers ang ilang gipangdakop.
Samtang sa 120 ka barangay sa Probinsiya sa Sugbo nga nakabaton og drug-cleared status, 19 niini ang nameligrong mabakwian sa ilang titulo ug mapasakaan og kasong administratiba ang mga opisyal, matud ni Ruiz.
Usa na niini ang Lungsod sa San Francisco diin sa 10 ka barangay nga drug-cleared, usa na lang ang nagpabilin sa maong status tungod kay dunay nagpositibo sa drug test sa siyam niini.
Niadtong Biyernes nadakpan sa buy-bust operation sa Barangay Union sila si Marie Ann Maglasang, 42, ug kapuyo niini nga si Christopher Cobrado, 41, ug nakuhaan og binulto nga shabu nga balor og kapin sa P4 milyones.
“In-ana sila kadako because ang ilang lead, direkta sila sa New Bilibid Prison, unya ang ilang supplier is one of the biggest distributor diri sa Pilipinas,” matud ni Ruiz.
Dugang ni Ruiz nga gipadad-an na nila og suwat ang maong mga barangay aron paesplikaron nganong dunay nagpositibo sa drugas sa ilang barangay.
Lakip sa gipadad-an sa maong suwat ang Lungsod sa Sogod diin sa pito ka barangay nga cleared sa drugas, lima sab ang dunay nagpositibo.
“Dili unta sila makampante. Dapat i-monitor na nila. Dili sila dapat magsalig nga abi drug-cleared na sila, okey na mobalik,” matud ni Ruiz. -/GMR (BANAT NEWS)
- Latest
