Bata naanod sa baha patay
CEBU, Philippines – Sayes-anyos nga tinun-an sa Grade-1 sa Campo 8 Elementary School sa dakbayan sa Toledo namatay human nga naanod sa kusog nga baha dihang mipugos kini paglabang sa sapa paingong mopauli gikan sa eskuwelahan.
Matud pa nga ang bata nga si Jocelyn Bolo ug ang 10-anyos niyang ig-agaw, mipugos g’yud pagtabok sa sapa nga nagbaha na niadtong Lunes sa udto tungod sa kusog nga uwan, apan ang bata wala makasugakod sa bul-og sa tubig kay gidam-agan siya sa dakong gapnod.
Mga lumolupyo didto sa Sitio Canapnapan 3, sakop sa Barangay Campo 8, midali pagpangita sa bata apan wala nila kini makit-i. Si Kapitan Divina Cantalejo sa Barangay Campo 8 misugilon nga ang duha ka bata mopauli na unta sa ilang balay kaniadtong Lunes sa udto.
Ang inahan sa bata nga si Maria Teresa didto ra sa ilang balay ug nakurat na lang diha nga gipahibalo siya sa nahitabo sa iyang anak. Ang amahan sa bata nga si Reneboy nagtrabaho isip construction worker.
Matud pa nga ang patay’ng lawas sa bata nakaplagan na lang kagahapon nga patay na ibabaw sa usa ka bato daplin sa sapa didto sa Barangay Cantabaco, sakop gihapon sa dakbayan sa Toledo, apan mga duha ka kilometro na ang gilay-on gikan sa dapit nga naanoran sa bata.
Awhag sa barangay kapitan nga pahimangnoan g’yud unta sa mga ginikanan ang ilang mga anak nga kun mag-uwan dili gayud mopugos paglabang sa sapa. -/RUB (FREEMAN)
- Latest