“Spaghetti wires” ipatangtang sa Talisay

CEBU, Philippines - Buot nga ipatangtang sa mga opisyal sa Dakbayan sa Talisay ang mga nagkutay nga kable sa kuryente nga nahisama og spaghetti kini aron dili na masubli ang nahitabong disgrasya nga nipatay og usa ka batan-on.

Kahinumduman nga namatay human mabitik sa nagbitay nga wire ang 20-anyos nga si Philip Carlo Lao samtang nagmaneho og motorsiklo ug niangol sa iyang hinigugma nga si Niña Marie Delfino. Nahitabo ang maong insidente sa may Uldog St., Barangay Poblacion niadtong Huwebes sa gabii.

Gihulagway sa mga opisyal sa Talisay nga kadtong mga dagkong sakyanan ang nakaingon nganong naputol ang mga kable ug angay sila manubag sa maong salaud.

Si Konsehal Antonio Bacaltos Jr. niawhag sa ilang sekretarya sa pagpadala og suwat ngadto sa Visayan Electric Company (VECO), mga kompaniya sa cable ug telephone companies aron sila imbitaron sa ilang sesyon aron mahatagan og kasulbaran ang maong suliran.

Apil unya nga ipatawag ang 22 ka barangay kapitan sa siyudad ingon man ang mga kompaniya nga aduna’y dagkong sakyanan nga nahimutang duol sa aksidente.

Gipahibawo ni Acting Vice Mayor Julian Daan nga trabaho sa mga kapitan ang pagtaho sa mga wire nga nangaputol aron ilikay sa disgrasya ang mga moagi sa ilang lugar. Lakip sab niini mao ang pagpasuga sa mga karsada.

Nasayran nga lugar nga nadisgrasyahan ni Lao, ngitngit hinungdan nga wala mabantayi niini ang kable nga nagbitay.

Apan si Kapitan Raul Cabañero, ang presidente sa Association of Barangay Council (ABC) nibutyag nga kadaghan na siya moreport sa mga kable nga naputol o nagbitay apan aduna gyu’y higayon nga dugay motubag ang ilang gipadad-an sa maong yangongo.

Matud ni Cabañero nga dili kini masulbad sa usa ka tawo o usa ka ahensiya kon dili mao ang pagtinabangay sa daghang sector.

Asoy pa niya nga ang mga dagkung sakyanan   niagi sa lugar maoy responsable sa nahitabong disgrasya kay dili naman sila makabantay nga nakaputol na sila og kable tungod sa kadaku sa ilang mga sakyanan. (BANAT NEWS)