Air freshener nasaypang bomba

CEBU, Philippines - Nabulabog ang final inter-agency meeting alang sa ASEAN Summit sa Cebu Port Authority tungod sa giingong bomba nga napalgan sulod sa comfort room kagahapon.

Apan matud ni Police Regional Office-7 Director Noli Taliño nga usa lang kadto ka drill aron masuta kung unsa ka preparado ang kapolisan alang sa umaabot nga dakong kalihukan sa Sugbo.

Si Konsehal Dave Tumulak, chairman sa committee on public order and safety sa konseho sa siyudad, nibutyag nga dali siyang nigawas sa lugar human nadunggan nga adunay bomba sulod sa CR.

Girespondehan kini sa Explosive Ordnance Division ug K9 Unit.

Si Taliño sa iyang bahin niingon nga usa lang kadto ka simulation exercise nga magamit alang sa mga umaabot nga kalihukan sa ASEAN Summit nga himoon sa Sugbo karong Hulyo 1 hangtud 7.

Si Atty. Yusop Uckong sa CPA nibutyag nga usa lang ka electronic air freshener nga napalgan sa basurahan ang nasaypang bomba sa usa ka polis tungod kay aduna kini timer ug mo-blink sab kini.

“Iyang (janitor) ginaug to para butangan og bag-o mao to nasugoan man siya og lain mao to nabutang niya sa basurahan. Karon kay nalimot man siya mao to natabunan. Karon nga naa siguro’y polis nga nag-CR, kakita siya nga naay nag-blink blink mao to na alarmed siya pero wala man,” matud niya.

Ang janitor nga si Reyjie Mark Puyos nipamatuod sa maong taho.

Sa laing bahin, si Taliño nibutyag nga aduna silay gimugna nga mga sub-task group alang sa seguridad, emergency preparedness response ug peace and order.

Ipakatap ang 4,300 ka polis alang sa seguridad sugod karong katapusan sa Hunyo.

Dugang ni Taliño nga abagan sab sila sa mga sakop sa Armed Forces of the Philippines, Philippine Navy, Coast guard ug uban pang ahensiya sa gobiyerno.

Samtang ang Bureau of Fire Protection mosugod na sa pagpakatap sa ilang mga sakop alang sa ika-duhang hugna sa ASEAN Summit.

Sumala pa ni BFP-7 Director Samuel Tadeo nga nangayo sila og dugang tawo gikan sa National Capital Region lakip na sa hazmat van ug ambulansiya.

Dili mominus sa 800 ka bombero ang gitagana nga motabang sa pagpahugot sa seguridad sa ASEAN Summit sa Sugbo. (Camille L. Pateres ug Rowena D. Capistrano/GMR)

Pagkatawo ni Gina Lopez gikwestiyon ni Tomas

Gikwestiyon ni Cebu City Mayor Tomas Osmeña ang kredibilidad ni kanhi Department of Environment and Natural Resources  Secretary Gina Lopez sa pagpakigtagbo kang Konsehal Joel Garganera karong Huwebes.

Si Lopez dunay tambungan nga kalihukan sa usa ka unibersidad sa siyudad ug human niini magkita sila ni Garganera.

Kini aron tukion ang nadawat nga video gikan sa usa ka independent group may labot sa slum area duol sa kontrobersiyal nga Inayawan landfill.

Gitug-an sab ni Garganera nga lakip sa ilang tukion ang mahitungod sa landfill.

Dihang DENR secretary pa si Lopez, personal niyang gibisita ang Landfill ug nimando sa pagpasira gumikan sa ka delikado ug kadaghang kalapasan. Matud ni Osmeña nga gibasura na ang appointment ni Lopez ug nalipay siya gumikan sa sayop nga pamahayag bahin sa landfill.

Nidugang ang mayor nga walay kwestiyon ang sinseridad ni Lopez apan iyang gikwestiyon ang kredibilidad niini. (BANAT NEWS)