Paggamit sa drugas ipahimong legal

CEBU, Philippines - Pipila ka organisasyon ang padayong nanawagan alang sa pag-usab sa balaud batok sa ilegal nga drugas sama sa paghimong legal sa paggamit niini sa mga non-violent offenses.

Apan pahinumdum sa Department of Health nga sa kinatibuk-an walay kaayuhan nga gihatag ang drugas.

Karong Lunes gideklarar sa grupong International Drug Policy Consortium (IDPC) nga Global Day of Action alang sa panawagan nga usbon ang balaud batok sa ginadiling drugas.

Matud ni Gloria Lai, senior officer sa IDPC, nga dili solusyon ang pagpakiggubat batok sa drugas.

Iyang gipasabot nga ang pagpamaligya krimen apan ang paggamit nga alang lang sa kaugalingong konsumo himuong legal diin gikinahanglan lang ang saktong pagpasabot sa kadaut nga dala niini sama sa ilimnong makahubog ug sigarilyo.

Atol sa kalihukan karon Lunes ila sab ipahinumdum   nga dili makatabang ang pagpatay sa mga nalambigit sa ilegal nga drugas. Kauban sa IDPC ang Cebu Plus Association Incorporated.

Si Dr. Dino Caing sa DOH-7 nagkanayon nga walay kaayuhan nga dala ang drugas ngadto sa tawo base sa mga testimoniya. (BANAT NEWS)