Boniel ibalhin sa Bohol
Ibalhin ... Si Atty. Gerry Carillo nilili sa karsel sa Police Station 2 sa Cebu City Police Office diin nahimutang si Bohol Board Member Niño Rey Boniel. Usa ka korte sa Bohol ang nimando pagpakostudiya kang Boniel didto sa BJMP sa Bohol. Clydyl Avila
CEBU, Philippines - Personal nga gihatod sa usa sa mga abogado ni Bohol Provincial Board Member Niño Rey Boniel nga si Atty. Gerry Carillo ang court order sa Bohol RTC branch 54 nga nagmando nga adto prisuhon sa BJMP sa Talibon, Bohol ang iyang kliyente. Gitagalan lang sa korte og 72 ka oras ang kapolisan aron pagtuman sa maong kamandoan. Nagpasabot kini nga kinahanglang mabalhin na sa Bohol si Boniel sud sa tulo ka adlaw gikan pagkadawat sa mga polis sa kamandoan.
Nadawat ang maong order sa Police Station 2 kagahapon sa alas 3:15 matud pa sa usa pa niya ka abogado nga si Atty. Inocencio Dela Cerna.
Kini mao ang commitment order sa kasong Serious Illegal detention nga gipasaka batok kang Boniel human gipasanginlan ni Angel Leyson, suod nga higala ni Bien Unido Mayor Gisela Bendong-Boniel nga gipusasan siya didto sa Dive Camp sa Bien Unido diin kauban ang iyang 17 anyos nga anak.
“Dili na gyud na mabalibaran because court order man na. This is not about questioning the imprisonment. Kana, court order na kana nga ibalhin didto sa BJMP Bohol (si Boniel),” si Dela Cerna miingon.
Samtang si Carillo nga niingon nga malisod kini sa habig sa iyang kliyente tungod kay maglabang-labang na pud kini sa Bohol ug Cebu tungod sa kasong parricide nga gipasaka batok kaniya didto sa Dakbayan sa Lapu-Lapu.
Si Niño Rey aduna pay kasong parricide nga atubangon human kini gipasanginlan nga maoy nag-kidnap ug nagpusil patay sa iyang asawa nga si Gisela kinsang padayon pang gipangita sa kadagatan sa isla sa Caubian ug Olango sa Dakbayan sa Lapu-Lapu.
Ang hepe sa maong police station nga si PCI Ma. Theresa Macatangay miingon nga respetuon nila ang desisyon sa korte apan ila pang sabuton ang pagbalhin kaniya alang sa iyang seguridad.
“Whatever is ordered by the court, we will accordingly comply,” matud pa sa maong hepe. (BANAT NEWS)
- Latest
