Shabu nasakmit sa terminal

CEBU, Philippines - Balor og P371,700 nga shabu ang nasakmit sa Cebu South Bus Terminal niadtong Miyerkules nga suway unta nga ipadala sa Lungsod sa Barili.

Apan nakasibat ang tawo nga nagpadala kinsa giingong nisuway og suhol og kwarta sa security guard dihang gisusi ang sulod sa paper bag nga ipadala  unta sa usa ka Lola Gabina.

Nasuta nga ang paper bag adunay sulod nga 120 ka gagmayng pakete ug duha ka medium nga pakete sa gituohang shabu.

Dihang giinspeksiyon sab ang binilin nga motorsiklo, ilang napalgan ang duha ka gagmay’ng pakete sa gidudahang shabu.

Nailhan lang ang dagway sa tawo nga giingong usa ka high-value target ug apil sa usa ka drug group sa Dakbayan sa Sugbo diin ang trabaho niini mao ang tigdala og drugas.

Samtang nasikop ang tigpayuhot og ilegal nga drugas sa buy-bust operation sa Kintolimbo, San Roque, Siyudad sa Talisay niadtong Miyerkules sa hapon.

Ang nadakpan mao si Dante Saludar, 23-anyos, nagpuyo sa maong lugar, kinsa nakuhaan og upat ka gagmay nga pakete sa shabu.

Sa laing bahin, lima ka tawo ang nasikop atol sa buy-bust operation sa kapolisan sa San Roque, Lamac, Lungsod sa Consolacion niadtong Miyerkules sa hapon.

Ang nasikop naila nga sila si Carlito Beleña, subject sa buy-bust, kauban sila si Junrey Beleña, Efredo Pitogo, Rholen Romano ug Mark Vincent Cabiluna kinsa padulong na untang manuyop.

Nasakmit gikan sa mga dinakpan ang 65.54 gramos nga shabu nga mobalor og dul-an sa P774 mil ug kagamitan sa pagsuyop ug usa ka 38 kalibre sa armas nga adunay upat ka bala. Camille L. Pateres, Gabriel C. Bonjoc ug Rowena D. Capistrano (BANAT NEWS)