PRO-7 makig-alayon sa UBAS
CEBU, Philippines - Makig-alayon ang Police Regional Office-7 sa Archdiocese of Cebu sa proyekto nga Ugnayan ng Barangay at Simbahan (UBAS) tumong sa pag-abag sa mga drug surrenderers nga mahilayo sa drugas. Ang proyekto gilangkuban sa 33 ka parokya sa tibuok Sugbo lakip na ang Dakbayan sa Lapu-Lapu, Talisay ug Mandaue.
"Gi-organize ni nilang Father Diola, Archbishop Palma, silang Bishop Rañola. So, nag-organized ni sila og gitawag nga LaBangers ang mga drug surrenderers," matud ni Senior Supt. Renato Dugan, bag-ong hepe sa Regional Police Community Relation Division sa PRO-7.
Ang 'LaBangers' minugbo sa Laban, Bangon, diin adunay usa hangtud sa duha ka buwan nga pagpangandam sa nagkadaiyang parokya ug laing unom ka buwan nga psycho-spiritual education ug fellowships.
Ang papel sa kapolisan sa maong programa mao ang pagsuta kung angayan na bang tangtangon ang pangalan sa maong mga surrenderers sa drug watchlist aron makasugod na sila og bag-ong kinabuhi nga lingkawas sa drugas, matud ni Dugan. (BANAT NEWS)
- Latest